ڕاهێنەری ماندوونەناس و دواڕۆژڕوونی بانە، “پوویا فەتاحی”
ـ کارناسی باڵای بەڕێوەبەرێتی وەرزشی
ـ بەرپرسی کومیتەی تڕامپۆلین ژیمناستیکی پارێزگای کوردستان
ـ بەرپرسی لیژنەی ژیمناستیکی شارسانی بانەپوویا فەتاحی، ساڵی ۱۳۷۱ی هەتاوی لە بنەماڵەیەکی وەرزشکاردا، چاوی بە ژیان هەڵێنا.
وەرزشی سەرەتایی و بنەڕەتی ژیمناستیکی، لە ژێر چاوەدێری باوکی(بەڕێز نەجمەدین فەتاحی، مامۆستا و بناغەدانەری وەرزشی ژیمانستیک لە شاری بانە) و مامی(بەڕێز کەیوان فەتاحی، مامۆستا و پسپۆڕی ژیمناستیک، فێرکار و ڕاهێنەری پلە یەک و ناوبژیوانی نێونەتەوەیی ئێران، لە ڕشتەی وەرزشی “ترامبۆلینگ” و “تڕامپۆلین ژیمناستیک”،  دەستپێکرد.

فەتاحی، دوای پازدە ساڵ چالاکی و تێکۆشانی بێوچان لە ساحەی وەرزشی ژیمانستیکدا، لە ساڵی ۱۳٨۷ی هەتاوی و بەدوای بەشداری لە پۆل و وانەی ڕاهێنەری، وەک کەسایەتییەکی پسپۆڕ و شارەزا، هاتە گۆڕەپانی ڕاهێنەرییەوە.

پوویا، وەک ڕاهێنەرێکی گەنجی بەتوانا و بەئەزموون لە وەرزشی ژیمناستیکی شارەکەمان، لە  ماوەی ساڵانی ڕاههێنەری خۆی، توانیویەتی گەلێک وەرزشوانی بانەیی بگەیێنێتە ڕادەی لەسەرترین پلەکان لە ئاست پارێزگای کوردستان و ناوچەیی و سەرانسەری ئێران و دواجار بیانگەیێنێتە پلەی ئەندامیی تیمی نەتەوەیی گەلانی ئێران. بۆ نموونە دەتوانین ئاماژە بە ئاغایان “ئاڕشین ئەحمەدی”، خاوەنی مەداڵیای زێڕی پاڵەوانی ناوخۆی وڵات لە ڕێزەی تەمەنی مێرمنداڵان و  “هێژا مەحموودی” بکەین کە بە وەدەستهێنانی نیشانگەلی جۆربەجۆر لە کێبەرکێ سەرانسەرییەکانی ئێران تووانیویانە چەن جار بانگێشت بکرێن بۆ  ئۆردووی تیمە نەتەوەییەکانی  لاوانی ئێران.

بەڕێز فەتاحی لە ساڵی ۱۳۹٤، بڕوانامەی زانتسگەی لە ڕشتەی ئەندازیاریی ئاوەدانی و لە ساڵی ۱۳۹٨، بڕوانامەی کارناسی باڵای لە ڕشتەی بەڕێوەبەریی وەرزشی بەدەست هێنا. خاوەنی بەڵگەی فێرکاری و ڕاهێنەرییە لە گشت لقەکانی ژیمناستیکدا و، بەتازەیی لە لایەن کادری فەننی فیدڕاسیۆنی ژیمناستیکی ئێران، وەک ڕاهێنەری تیمی نەتەوەیی تڕامپۆلین ژیمناستیکی لاوانی ئێران، بۆ کەمپی تیمی نەتەویی گەلانی ئێران بانگێشت کرا.

فەتاحی، بە داڕشتنەوەو و نووژەنکردنەوەو چالاکسازی ژێرلقە وەرزشییەکان، تووانی لە هەر لقێکدا، وەرزشوانە بەهرەمەند و لێهاتووەکان دەستنیشان بکات و بەستێنی پێویست بۆ گەشەی لێهاتووییەکانی وەرزشوانان دابین بکات.

ڕاهێنەری دواڕۆژڕوونی بانەیی، لە پاڵ مەشق و پڕۆڤە وەرزشیەکاندا، بەردەوام  لە نێو وەرزشوانان، جەخت و پێداگری کردووە لەسەر بووژانەوەی هەموو ئەو چالاکییە فەرهەنگییانەی پێوەندیان بە ژیمناستیکەوە هەیە. بۆ وێنە، ئامادەکاری، نووسین، سازکردن و چاپ و بڵاو کردنەوەی بێبەرامبەری “گۆڤاری وەرزشیی پوویا”(مجلە ورزشی پویا)، لە نێو خوێندگە سەرەتاییەکانی بانە. مەبەستی سەرەکی لەو چالاکییانە، هاندانی منداڵان بووە بۆ چوون بەرەو وەرزشگاکان و فەرهەنگسازی وەرزشی و دۆزینەوە و دەستنیشانکردنی بژاردە و لێهاتووییە وەرزشییەکان.

پوویا فەتاحی، بنیاتنەری یاریگەی(باشگاە ژیمانستیک پوویا)، هەمێستاکەش بەڕێوەبەری ئەو یاریگە وەرزشییەیە. یاریگەیەک، کە لەباری کەرەستەی یاریی وەرزشیی ژیمناستیکەوە، یەکێکە لە بەڕۆژترین و ئامادەترین هۆڵەکانی ژیمناستیکی ئێران. پوویا فەتاحی، بە درێژایی ساڵانی دوای سازکردنی ئەو یاریگایە، بە پشت بەستن بە ئەخلاقی وەرزشی و بە چالاکیی سرنجڕاکێش و بەردەوام و، پلان و بەرنامەڕێژی ڕێکوپێک و، سەرکەوتوویی و درەوشانەوەی وەرزشوانان، توانیویەتی ڕەوتی هەڵکشان و گەشەی وەرزشیی بنەڕەتیی ژیمناستیک، لە شاری بانە دەستەبەر بکات.
وەک بنکەی ئاشتی بانە، وێڕای ڕێز و حورمەت بۆ هیمەتی بەرزی کاک پوویا فەتاحی، هیوادارین گەشەو پێشکەوتنی ئەو وەرزشەو هەموو ڕشتە  وەرزشییەکانی بانە بەردەوام بێت و، هیوای سەرکەوتن بۆ گشت وەرزشوانان و ڕاهێنەرانی گشت بوارە وەرزشییەکانی بانە دەخوازین.
بنکەی گەشەی فەرهەنگی بانە(ئاشتی)
۲۲ی پووشپەڕی ۱٤۰۲ی هەتاوی(۲۲، ٤، ۱٤۰۲)