مەلا عەبدوڵڵا توتنچی ناسراو به موفتی پێنجوێنی شاعێری نەتەوەیی کورد لە ساڵی ۱۸۸۱ دا لە گوندی بێستانە سەر بە پێنجوێن لە باشووری کوردستان لە دایک بووە.

نازناوی موفتی لە لایەن مەلا عەبدولقادر بیارەیی پێ بەخشراوە. بە ناوی مەلا عەبدوڵڵای موفتی شاری سنەوە.
موفتی پێنجوێنی بە منداڵی باوکی کۆچی دوایی دەکات و لە تەمەنی حەوت ساڵی دا لە خزمەت برا گەورەکەی مەلا ئەحمەد دەستی بە خوێندن کردووە .
پاشان
بۆ درێژە دان بە خوێندنەکەی چۆوەتە ڕۆژهەڵاتی کوردستان، شارەکانی بۆکان،مهاباد و سەقز و گەڕاوەتەوە بۆ پێنجوێن.

موفتی لە تەمەنی ۲۲ ساڵی دا ژیانی هاوبەشی پێک هێناوە. یەکەمین شێعری ئەو شاعێرە گەورە لە ساڵی ۱۹۳۶ لە ڕۆژنامەی ژیان دا بڵاو بۆتەوە.
هەروەها لە لە ڕۆژنامەی کوردستان و گۆڤاری هەڵاڵە لە سەردەمی کۆماری مهاباد هۆنراوەکانی موفتی پێنجوێنی بڵاو بۆتەوە.

دوای دەست هەڵگرتن لە خوێندنەکەی ڕووی کردۆتە فرۆشتنی تووتن و دووکانێکی فرۆشتنی تووتن و کەل و پەلی دیکەی داناوە.

به هۆی دژایەتی کۆنەپەرستیەوە هەوڵیان داوە بیکوژن و هێرشیان کردۆتە سەر و تەنانەت دووکانەکەشیان سووتاندووە.
موفتی پێنجوێنی کەسێکی ڕۆشنبیر و پێشکەوتوو خواز بووە و جگە لە خۆشەویستی نیشتمان و ئاماژە بە گرینگی وەتەن، لە شێعرەکانیدا کچان و کوڕانی کورد هان دەدا بۆ خوێندن و بەرز کردنەوەی کوردستان. موفتی پێنجوێنی لە سەردەمی کۆماری مهاباد چۆتەوە ڕۆژهەڵاتی کوردستان و لە مهاباد نیشتەجێ بووە.

حەوت ساڵ دوای کۆچی واتا ساڵی ۱۹۵۹ یەکەم دیوانی شێعری ئەو شاعێرە بڵاو کرایەوە.

عەلی باپیرئاغا لە ساڵی ۱۹۳۹ یەکەمین نووسراوە سەبارەت بە موفتی و شێعرەکانی بە ناوی (گوڵدەستەی شوعەرای هاوعەسرم) بڵاو کردەوە.عەلی باپیری موفتی لەم جۆرە پێناسە دەکات و دەڵێ:
موفتی زۆر دەوڵەمەندە لە تەبیعەت و ئەخلاق دا، بەڵام زۆر هەژار و نەدارە لە سەروەت و تفاق دا.

۲۵ی جۆزەردانی ساڵی ۱۹۵۲ لە شاری سلێمانی به هۆی نەخۆشیەوە کۆچی دوایی کردووە.
ئەگەر مردم تکایە گردی سەیوان ماڵ و قەبرم بێ
گەڵای ئەو دارە جوانانە لە جێی سابات و کەپرم بێ
تکاکارم لە ئاخر دا لە قاپی حەزرەتی یەزدان
لەگەڵ یارانی هاودەم، هەر ئەوێ مەیدانی حەشرم بێ

یادی هەرمان و ڕێگای بەردەوام