ڕۆژی دووشەممە ۲۱، ٤، ۱٤۰۰ی هەتاوی،  کۆڕێک، تایبەت بە ڕێزلێنان لە بەرهەمی خاتوونی بەڕێز، ”مێهری بەرهوون”، بە بۆنەی وەرگێڕانی سەرکەوتوانەی ڕۆمانی ”هەورەکانی دانیال”ی، نووسەر ناوداری گەلەکەمان، ”بەختیار عەلی”، (ابرهای دانیال)، لە نووسینگەی بنکەی ئاشتی بانە بەڕێوەچوو.
✍لەو کۆبوونەوەدا کە چالاکیی هاوبەشی بنکەی ئاشتی و بنکەی بەڕۆژەی بانە بوو، ۳۰ کەس لە ئەندامانی بەڕێزی ئاشتی و بەڕۆژە و میوانانی هەر دوو لا بەشدار بوون.
✅ بۆ ئەو کۆبوونەوەمان ڕێکخست؟

✍ نووسراوە و ڕۆمانەکانی مامۆستای قەڵەم، بەختیار عەلی، نووسەر و ڕۆمان نووسی لێهاتووی کورد، جێگەو پێگەی شیاو و تایبەتیی خۆی، نەک لە نێو وێژەو ئەدەبی کوردیدا جێگیر کردووە، بەڵکوو بە هۆی وەرگێڕانی زۆربەی ڕۆمانەکانی بە زۆرێک لە زمانە زیندووەکانی جیهان، خۆی گەیاندۆتە ئاستێکی جیهانی. بەختیار عەلی بە قەڵەمێکی سادەو سێحراوی، بە ژانڕ و شێوازی ڕێئالیزمی جادوویی، بیر و ئەندێشەیەکی قووڵی فرەڕەهەندی لە هونەری نووسین و نوواندن و نیگارکیشی و مۆسیقا و فەلسەفەو مێژو و دەروونناسی و کۆمەڵناسی، خزاندۆتە ناوەڕۆکی چیرۆک و ڕۆمانەکانییەوە. هەر بۆیەش دەمێک ساڵە، سرنجی بەردەنگ و خوێنەر و ڕەخنەگرانی ئەدەبی و فستیڤاڵە ئەدەبییەکانی جیهانیی ڕاکێشاوە.
بەداخەوە لە ناوخۆدا وەک شایانی ئەو قەڵەمە پڕشکۆیە، ئاوڕی شیاوی لێ نەدراوەتەوە. جێی داخە کە سەرتا بەرهەمی نووسەرەکانمان بە زمانی کوردی وەک ئەرکێکی پێویست ئاوڕێکی ئەوتۆی لێ نەدراوەتەوە و زۆربەمان ئەو کاتە وەخەبەر دێینەوە کە بەرهەمی زەحمەت و ماندوو بوونی  نووسەرەکانمان، وەک بەرهەمێکی هەرە بەبایەخی ئەدەبی بە زمانەکانیدی دەبینین و بە خۆمان دەڵێین: ئەوە بۆ من هەتا ئێستا نەمدیتووە؟!! ئەوە لەحاڵێکدایە کە ئێمەش وەک گشت نەتەوەکانیدی پێویستە کەسایەتییە بلیمەتە هەڵکەوتەکانی خۆمان بناسین و بەرهەمە ڕەنگینەکانیان ببینین و بخوێنینەوە و بە دیترانییان بناسێنین. هەر لەبەر ئەوە، بە پێویسمان زانی کە هەر هەنگاوێک بۆ ناساندنی بەرهەمەکانی بەختیار عەلی و دیکەی نووسەران و هونەرمەندانی گەلەکەمان، بەرز بنڕخێنین.
✍ بەم ڕوانگەو بۆچوونەوە، ئێمە وەک بنکەی ئاشتی و بنکەی بەڕۆژەی بانە، دوای چەن کۆبوونەوەی هاوبەش، بەو ئەنجام و ئەکامە گەیشتین کە پێویستە هەنگاوی بەرز و بەنڕخی خاتوونی هێژا و لێهاتووی شارەکەمان، ”مێهری بەرهوون”، برز بنڕخێنین و یارمەتیدەر بین، هەم بۆ ناساندنی بەرهەمی ماندوویی و تێکۆشانی بەڕێزیان و هەم ناساندنی بەرهەمێک لە خەرمانی بەرهەمە شەنگین و سەنگین و ڕنگینەکانی یەکێک لە نووسەرەرانی پایەبەرزی کورد.

✍ ”غەوارەکان پتر خەڵکانێکن، وەک ئەوەی نەتەوە، شار، نیشتمان و زمانێکیان نەبێت؛ کە بە یەکجار لە گوندەکانی خۆیان هەڵکەندرێن و ئیتر وەک مرۆڤی ئاسایی لە هیچ شوێنێک، جێگایان نابێتەوە” لاپەڕەی ٢٠ – هەورەکانی دانیال – بەختیار عەلی
✍ ”غریبەها بیشتر بە مردمانی می مانند، کە انگار ملیت، شهر، سرزمین و زبانی نداشتە باشند؛ مردمانی کە ناگهان از روستایشان کندە شدە و دیگر هیچ جایی سرزمینشان نیست” – لاپەڕەی ٢١ – ابرهای دانیال – مێهری بەرهوون

✍ – کۆبوونەوەی ڕێزلێنان لە خاتوو بەرهوون، بە وتەکانی ئەندامی بەڕێزی بنکەی ئاشتی، ”مەنسوور ئەمین” نژاد دەستی پێکرد. بەڕێزی، لەگەڵ بەخێڕهێنانی دانیشتووان، وەک دەسپێکی بەرنامەکان، بەخێرهاتن و دەسخۆشیی لە خاتوو بەرهوون کرد. ئاماژەی کرد بە کەسایەتی و بەرهەمەکانی بەختیار عەلی و ئەو هێز و توانایی و هیزر و ئەندێشەی کە قەڵەم و بەرهەمەکانی ئەو نووسەرە مەزنە، بە بەردەنگەکانی دەبەخشێت. ئاماژە کرا بە سەختی و گرنگی کاری وەرگێڕانی بەرهەمە ئەدەبییەکان و ئەوەی کە چۆن وەرگێڕانی چیرۆک و ڕۆمان و نووسراوە ئەدەبییە کوردییەکان، بۆنەتە هۆکارێک، بۆ ناساندن و جیهانی کردنی ئەو بەرهەمانە.
✍ – وەرگێڕی ڕۆمانی ”هەورەکانی دانیال” بە زمانی فارسی، خاتوونی بەڕێز، ”مێهری بەرهون”، لە ماوەی ٣٠ خولەک دا، وەک ڕاوێژکارێکی دەروونناس، تیشکی خستە سەر ئەو هۆکارانەی کە هانیان دا بۆ وەرگێڕانی ئەو بەرهەمە. باسی گەشت و سەفەرەێکی کرد لە گەڵ هەورەکانی دانیال، بۆ نێو جەرگەی جیهانی دەروونناسی و ڕەهەندە کۆمەڵایەتییەکانی ئەو ڕۆمانەوە. باس لەسەر گرینگی چیرۆکەکەو و کاراکتەرە بەهێزەکانی. باسێکی چڕی دەروونناسیی، لەسەر جیاوازی ئەو ڕۆمانەو ڕووداو و بەسەرهاتەکانی تاک و کۆمەڵگەی نێو ڕۆمانەکە. ئەوی کە بە تایبەت سرنجی هەموانی ڕاکێشا، هەڵسەنگاندن و بەراوردی  کاکڵ و توێکڵی ئەو ڕۆمانە بوو، لە گەڵ زانستی دەروونناسی  و کۆمەڵناسی و بەگشتی زانستی دەروونناسی تاکیی و کۆمەڵایەتی و ئەو ئاستەنگ و کێشە دەروونیانەی ڕۆحی تاک و کۆمەڵگای تەنیوەتەوە.
✍ – بەڕێز ” محەمەد سدیق کەریم پوور”، ئەندامی بەڕێزی بنکەی بەڕۆژە، بەخێرهاتنی میوانەکانی کرد و وێڕای دەسخۆشی و ماندوو نەبوونی لە خاتوو بەرهوون، ئاماژەیان پێدا کە پشتیوانی لە قەڵەم و خاوەنانی بەرهەمە ئەدەبییەکان، ئەرکێکی گشتی و نیشتمانییە و پێویستە ئەدەب و وێژەی کوردی بگوازرێتەوە سەر زمانی دووهەم وەک زمانگەلێک، جیا لە زمانی خۆمان؛ بۆ ئەوەی لەو ڕێگایەوە هاسانتر و باشتر بتوانین هەم خۆمان بناسین، کە ئێمە کێین؟ هەم زانیاری و پێناسەی ڕاستەقینە لە خۆمانەوە بگوێزینەوە بۆ نێو لایەن و گەلانیدی. بەڕێز کەریمپوور تیشکی خستە سەر وتەکانی خاتوو بەرهوون و بە گرنگی نڕخاند و گوتی: گرنگیی ئەوەی لێرە، لەو نیو سەعاتەدا ئێوە باستان لێکرد، لە گرنگی ڕۆمانکە کەمتر نییە. بۆیە داواکارم ئەو بابەتانە بنووسەرەوەو ئامادەی کەن بۆ ئەوەی وەک پاشکۆیەک لەسەر چاپی دووهەمی ڕۆمانی ”ابرهای دانیال” دابندرێت.
✍ – بەڕێز ”شێرکۆ سەلیمی”، خاوەن و بەڕێوەبەری نووسینگە و پێشانگای ”کتێب فرۆشی ئایندە” لە شاری بانە، وێڕای ئاماژە بە چەن بەشێکی ڕومانی ”ابرهای دانیال”، باسی لە بەقەوەت بوونی شێوازی وەرگێڕانی ڕۆمانەکە کرد و هیوای بەردەوامی بۆ خاتوو بەرهوون خواست.
✍ ـ بەڕێز ”غەفوور ساڵحی”، وێڕای دەسخۆشی لە هەوڵ و ماندوویی خاتوو بەرهوون، بەشێک لە نووسراوە و بەرهەمی خوێندنەوەی خۆی لەسەر ڕۆمانی ”کۆشکی باڵندە غەمگینەکان”ی بەختیار عەلی، لە ژێر سەردێڕی: ”ئەم خەنجەرە مەلعوونە، لەو تێخانەیە کە دەسکی خۆیان دەبڕن” پێشکەش کرد.
– دووایین بەشی بەرنامە، تەرخان کرا بۆ پرسیاری حازرانی کۆبوونەوە و وڵامی خاتوو بەرهوون
– لە کۆتایی بەرنامەکەدا، لەوحی سپاس و پێزانین، لە لەیەن بنکەی ئاشتی و بنکەی بەڕۆژەوە، پێشکەش بە بەڕێز، خاتوو بەرهوون کرا.
بنکەی گەشەی فەرهەنگیی بانە – ئاشتی
بنکەی فەرهەنگیی – ئەدەبی بانە – بەڕۆژە